top of page

​Our Story...

Fabian

Sit über eme Jahr han ich scho es 3 am Rugge, meh Details gits nöd :), die erste drüü Jahr vo mim Läbe hani i de schöne Stadt Züri verbracht, nämlich in Höngg, bevors mini Familie und mich nach Thalwil verschlage hät. T`Lehr han bi eusere Dorf-Metzg gmacht und bin dere au 14 Jahr lang treu bliebe. Afangs 2013 hani denn t Polizeischuel bi de Stapo agfange.

Zum abschalte gangi gern go bike oder it Berge go wandere. Fuessball aktiv und passiv ghört ebefalls zu minere Lideschaft. Als echte Zürcher gits für mich natürli nur 1 Verein:

FCZ, EI STADT, EIN VEREIN!

Im Summer tueni gern de Grill aschmeisse und es chüels Bierli gnüsse, was gits schöners?!

Mini besseri Helfti han ich im Herbst 2005 i de Schützehalle z'Thalwil am Oktoberfest kenneglernt. Sie het mier wele mit folgendem Satz imponiere: "Ich han mini Corn-Flakes scho mit Bier trunke", im Laufe der Jahre het sich usegstellt, dass sie masslos übetriebe het, aber ebe, de Spruch het sini Würkig glich nöd verfehlt :)

 

 

 

Sandra

Ich bin im verschneite Monat März 1987 z'Züri gebore. Ufgwachse bini mit minere "chline" Schwöster und mine Eltere z'Thalwil am schöne Zürisee.

Und da wohni jetzt au scho sit 8 Jahr mitem Fäbe zäme, mier sind zwei echti Thalwiler und ziehnd da so schnell nüme weg. Ich han brueflich scho fast alles gmacht, über Coiffeuse, Kellnerin, Réceptionistin, Versicherige und jetzt bini sit es paar Jahr en Bürogummi, was mer zimli guet gfallt.

Wenni nöd grad am schaffe bin, denn findet mer mich oft i de Chuchi am neui Sache usprobiere, meistens Süesses :) suscht bini jede 2. Sunntig im Letzi aztreffe (natürli für GC...!) oder bin eifach chli dihei und gnüsse s Dolce far niente. Das am liebste mit echli Swing-Musig und eme guete Buech.

Eusi gmeinschaftlichi Lideschaft isch Kenia, sit mer döt gsi sind, laht eus das faszinierende Land nüme los! Di 2. Lideschaft isch de Fuessball, wenn au für verschiedeni Clubs!

De Fäbe isch für mich min Partner i allne Lebenslage, mier hend scho villes zäme erlebt i dene bald 10 Jahr (jawohl 10 Jahr!!!). Ich freu mich wahnsinnig de nöchsti wichtige Schritt mit ihm chöne z'gah!

  • Facebook Square
  • Twitter Square
  • Google Square

© 2014 by Sandra & Fabian. Proudly created with Wix.com

bottom of page